განაცხადი, რომ კოჰაბიტაცია უნდა დასრულდეს, ავტორიტარული რეჟიმის მართვის დასაწყისია

სერგო რატიანი: ”ამომრჩეველმა უნდა იცოდეს, რომ პოლიტიკური ძალა, რომელსაც ხმა მისცა ერთი წლის წინათ, ფაქტობრივად, აღარ არსებობს”

ქვეყანაში შექმნილ პოლიტიკურ ვითარებასა და წინასაარჩევნო გარემოზე 'პრემიერის~ შეკითხვებს 'ნაციონალური მოძრაობის~ დეპუტატი სერგო რატიანი პასუხობს.

_ ბატონო სერგო, როგორ შეაფასებთ 'ნაციონალური მოძრაობის~ საპრეზიდენტო კანდიდატის დავით ბაქრაძის შანსებს, აქვს მას პირველსავე ტურში გამარჯვების შესაძლებლობა?

_ ვფიქრობ, დავით ბაქრაძის შანსები სერიოზულია, რადგან მისი მთავარი ოპონენტის გიორგი მარგველაშვილის რეიტინგი მიბმულია ბიძინა ივანიშვილზე, რომელიც პოლიტიკიდან უახლოეს პერიოდში წასვლას აპირებს. ამიტომ, იმედი მაქვს, ხალხი სწორ არჩევანს გააკეთებს. გამოდის, რომ პრემიერ-მინისტრის პოლიტიკიდან წასვლის შემდეგ ხალხთან პასუხისმგებელი პირი არ გვეყოლება, რადგან ამომრჩეველმა ნდობის მანდატი ბიძინა ივანიშვილსა და მის დაპირებებს მისცა, ის კი პოლიტიკიდან მიდის. ქართველმა ამომრჩეველმა უნდა იცოდეს, რომ ის პოლიტიკური ძალა, რომელსაც ხმა მისცა ერთი წლის წინათ, ფაქტობრივად, აღარ არსებობს.

_ პოლიტიკური ოპონენტები არჩევნებზე მეორე ტურის შესაძლებლობას გამორიცხავენ და სახელისუფლებო კანდიდატის გიორგი მარგველაშვილის გამარჯვებას პირველსავე ტურში ვარაუდობენ. თქვენ რას ფიქრობთ მარგველაშვილის შანსებზე?

_ დღეს საუბარს იმაზე, რომ ვიღაცას საპრეზიდენტო არჩევნებში მყარი რეიტინგი აქვს, არ გავრისკავდი.

_ როგორ უყურებთ ნინო ბურჯანაძის შანსებს?

_ პოლიტიკოსები, რომლებიც საარჩევნო კამპანიას ნეგატივზე აწყობენ, როგორც წესი, მარცხდებიან. გასულ წელს 'ქართულ ოცნებასაც~ ჰქონდა ნეგატივზე დაფუძნებული საარჩევნო კამპანია, მაგრამ დიდი დაპირებებიც იყო.

_ თუ ნეგატივზე დაფუძნებული კამპანია არ მუშაობას, მაშინ როგორ გაიმარჯვა კოალიცია 'ქართულმა ოცნებამ~?

_ მისი გამარჯვება მეტწილად სრულიად უტოპიურმა დაპირებებმა განსაზღვრა, რომელსაც 'ქართული ოცნების~ ლიდერებისგან ვისმენდით. ნინო ბურჯანაძე, 'ქართული ოცნებისგან~ განსხვავებით, მთლიანად ნეგატივზე აწყობს საარჩევნო კამპანიას და ვფიქრობ, წარმატების მიღწევაც გაუჭირდება.

_ რას გულისხმობთ ნეგატიურ საარჩევნო კამპანიაში?

_ ის მთლიანად პრორუსული ძალაა და უპირისპირდება იმ ძალას, რომელიც პრორუსულ პოლიტიკას ებრძვის. არა მგონია, ამგვარმა პოლიტიკამ საქართველოში წარმატება მოუტანოს.

_ კოალიცია 'ქართული ოცნების~ საპრეზიდენტო კანდიდატი აცხადებს, რომ საპარლამენტო არჩევნების შემდეგ კოჰაბიტაცია უნდა შეწყდეს. თქვენ როგორ წარმოგიდგენიათ ამის შემდეგ 'ნაციონალური მოძრაობისა~ და 'ქართული ოცნების~ ურთიერთობა?

_ ის, რომ კოჰაბიტაცია უნდა დასრულდეს, სერიოზული პოლიტიკური განაცხადიც კი არ არის, ეს უფრო ჟესტია. 21-ე საუკუნეში ხელისუფლების სხვადასხვა შტოში სხვადასხვა პოლიტიკური ძალები უნდა იყვნენ წარმოდგენილი და საუბარი იმაზე, რომ ეს უნდა დასრულდეს, არის განაცხადი ავტორიტარული რეჟიმის დაწყებაზე. მათ, უბრალოდ, ახალი პოზიტივის შექმნა არ შეუძლიათ, მაგრამ რაღაც ხომ უნდა თქვან და აცხადებენ, რომ კოჰაბიტაცია უნდა დასრულდეს. ისინი, მართალია, ამბობენ იმას, რა შეიძლება დასრულდეს, მაგრამ ვერ ამბობენ, რა შეიძლება დაიწყოს, რაც მნიშვნელოვანი პრობლემაა.

_ პრემიერ-მინისტრმა განმარტა, რომ ის პოლიტიკიდან საპრეზიდენტო არჩევნებიდან უახლოეს პერიოდში წავა. თქვენ რას ფიქრობთ, მართებულია ბიძინა ივანიშვილის გადაწყვეტილება?

_ ხელისუფლების მართვაზე პასუხისმგებელი პოლიტიკური ძალები უნდა დაფიქრდნენ საქართველოს მომავალზე, რადგან ის პირი, რომელმაც საპარლამენტო არჩევნები მოიგო და ხალხმა ნდობის მანდატი მიანიჭა, დაკისრებულ პასუხისმგებლობას გაურბის.

მირანდა ნაბახტეველი გაზეთი ”პრემიერი”, #2, 11-17 სექტემბერი

FaceBook