ცხვრის ექპორტი მკვეთრად მცირდება

რა პრობლემები აქვთ მეცხვარეებს?

ქართულმა ცხვარმა წარმატებული საექსპორტო პროდუქტის სტატუსი დაკარგა. ის ქვეყნები, რომლებიც გასაღების ბაზარი იყო, ქართული ცხვრის მაღალი ფასის გამო მისი ყიდვისგან თავს იკავებენ. არაბი ბიზნესმენები აქ ცხვარს დაახლოებით 50 დოლარად ყიდულობენ, თავიანთ ქვეყნებში კი 300 დოლარად ყიდდნენ. რატომ აქვს ქართული ცხვარს მაღალი ფასი და რა პრობლემების წინაშე დგანან მეცხვარეები _ ამასთან დაკავშირებით, ”პრემიერს” საქართველოს მეცხვარეთა ასოციაციის თავმჯდომარე ბექა გონაშვილი ესაუბრა.

_ ბექა, რა პრობლემების წინაშე დგანან მეცხვარეები?

_ პრობლემა ძალიან ბევრია. უპირველესი, რაც მეცხვარეებს აწუხებთ, რეალიზაციის პრობლემაა. მყიდველები არ არიან. მიზეზია ის, რომ საქართველოში ფასები მაღალია. მაგრამ არის კიდევ პრობლემები, რომელთა წინაშეც ვდგავართ. ეს არის გადასახადები: მიწის გადასახადი, რომელიც სულ მცირე 15 ლარია ჰექტარზე და ცხვრის გადასარეკი ტრასების მოუწესრიგებლობა. წელს სახელმწიფომ აცრები ჩაატარა უფასოდ და ამ მხრივ პრობლემა არა გვაქვს. თუმცა დარგი მისახედია პროფესიონალურ დონეზე.

_ მაღალი ფასის მიზეზი ეს არის?

_ დღეს საქართველოში გვყავს 700 000 სული ცხვარი. სარეალიზაციო ყოველწლიურად არის 150-170 ათასი სული. ზამთრის საძოვარი სულ გვაქვს 250 ათასი ჰეატრი. ნორმატივით ეს საკმარისი არ არის. ერთ ჰექტარზე უნდა იყოს 1 სული, ჩვენ კი გამოგვდის რომ არის 3-4. შესაბამისად, საქონელი ვერ სუქდება და ა.შ.. შესაბამისად, ვერ ხერხდება კარგ ფასად გაყიდვა. ამ დროს დანახარჯებია უზარმაზარი. დაახლოებით, ერთი სარეალიზაციო ცხვრის დანახარჯი არის 130 ლარი. ვთქვათ, მე რომ გავყიდო ცხვარი 150 ლარად, 130 ლარი არის მხოლოდ ხარჯები. ასეთი პრობლემებია.

_ თუ მიგიმართავთ შესაბამისი სამინიტროსთვის დამატებითი საძოვრების გამოყოფაზე, ან იმავე გადასახადის შემცირებაზე?

_ ყოველ წელიწადს ამაზე ვლაპარაკობ, მაგრამ ჯერ ამისთვის არავის მიუხედავს. გადასახადების შემცირების საკითხი რომ დავაყანე წინა მთავრობასთანაც და ახალათანაც, ყველამ წაუყრუა. არადა, როცა ეს გადასახადი მიიღო წინა მთავრობამ, საკითხის არანაირი შესწავლა და მისი ისე გაანგარიშება არ მომხდარა. არავის შეუსწავლია და არანაირი და გათვლა არ გაუკეთებია. ადრე იყო 3 ლარი, ახლა გვაქვს 15 ლარი.

_ ექსპორტი რამდენითაა შემცირებული?

_ 2009 წელს საქართველოში 266 ათასი სული ცხვარი გავიდა ექსპორტზე. 2011 წელს 150 ათასი, 2012 წელს 120 ათასი. თუ ვინმე დაინტერესდება ამ პრობლემების მოგვარებით, ვფიქრობ, დარგი გადარჩება და ქვეყნის ეკონომიკას წაადგება.

ნინო დარსაველიძე, გაზეთი “პრემიერი”, 4-10 სექტმებერი

FaceBook