ბნელი წარსულის ”ნათელი დღეები”

ახალგაზრდა რეჟისორების, ნანა ექვთიმიშვილისა და სიმონ გროსის პირველი სრულმეტრაჟიანი ფილმი ”გრძელი, ნათელი დღეები”, შეიძლება ითქვას, რომ ტრიუმფალურ სვლას განაგრძობს მსოფლიოს საფესტივალო ეკრანებზე... საქართველოს კინოთეატრებში კი ფილმის პრემიერა 19 სექტემბერს გაიმართება.

აღსანიშნავია, რომ ფილმი პირველად ბერლინის 2013 წლის საერთაშორისო კინოფესტივალზე, ”ფორუმის” პროგრამაში და უჩვენეს, სადაც მას სპეციალური პრიზი გადეცა. მოგვიანებით, აპრილში, ”გრძელი, ნათელი დღეების” ნამდვილი ”ნათელი” დადგა ჰონგ-კონგის პრესტიულ საერთაშორისო კინოფესტივალზე.

სადებიუტო რეჟისორულმა ნამუშევარმა როგორც ”ახალი ტალანტის კონკურსის”, ასევე კრიტიკოსთა პრესტიჟული ჯილდო მოიპოვა. გარდა ამისა, ფილმი ”ახალგაზრდა კინოს” კონკურსის ფარგლებში, ფაიერბერდის ჯილდოს (Firebird Award) მფლობელი გახდა. სწორედ ჰონგ-კონგის ყოველწლიური კინოფესტივალი იქცა ბევრი პერსპექტიული რეჟისორისთვის ერთგვარ ტრამპლინად.

დაჯილდოების ცერემონიალზე ჟიურის წევრებმა აღნიშნეს: ”აჯილდოებენ ფილმს იმისთვის, თუ როგორ შეუძლია უბრალო ამბავს მოზარდების შესახებ, ამდენი რამ მოგვითხროს ყოველდღიურ ძალადობასა და შიშზე, რომელიც საქართველოში არეულობის პერიოდში სუფევდა... ამავე დროს, ეს სიმკაცრე სრულებით არ უშლის ხელს პოეტურ ენას”.

აგვისტოში კი ფილმი სარაევოს საერთაშორისო კინოფესტივალის სამი მთავარი პრიზის მფლობელი გახდა: პრიზი საუკეთესო ფილმისთვის; პრიზი ”სარაევოს გული” _ ფულადი ჯილდო 16 000 ევრო, რომელიც მთავარი როლის შემსრულებლებს, ლიკა ბაბლუანსა და მარიამ ბოკერიას ერგოთ და ”არტ-ჰაუსის” საერთაშორისო კინოთეატრების პრიზი.

ფილმი ორი თოთხმეტი წლის გოგონას მეგობრობის შესახებ მოგვითხრობს. მოქმედება თბილისის გარეუბანში, 90-იანი წლებში ხდება. საქართველოსთვის ამ რთული და გარკვეულწილად, პატრიარქალურო დროის ასახვა, საკმაოდ რთულ ამოცანას უსახავდა რეჟისორებსა და ოპერატორს. კრიტიკოსები აღნიშნავენ სწორედ ოპერატორის, ოლეგ მუტუს შესანიშნავ ნამუშევარს, რომელსაც უკვე მსოფლიოში აღიარებულ რუმინელ რეჟისორთან, კრისტიან მუნჯიუსთან მუშაობის გამოცდილება აქვს.

ფილმი ქართულ-გერმანულ-ფრანგული კოპროდუქციაა. ეროვნული კინოცენტრის გარდა, მის შექმნაში გერმანიის და საფრანგეთის სახელმწიფო კულტურული ფონდები, გერმანიისა და საფრანგეთის ტელევიზიები _ ARTE და ZDF მონაწილეობდნენ.

დავით ბუხრიკიძე, გაზეთი "პრემიერი", 4-10 სექტემებერი

FaceBook