სიჩუმე! ყურადღება! ბოლო კითხვა... რა შემთხვევაში არის შესაძლებელი, იყო ბიძინა ივანიშვილის მთავრობის წევრი და ქეშად, ხელფასის გარდა, გიხდიდნენ 20 ათას აშშ დოლარს?
შეგახსენებთ, რომ თქვენ უკვე გამოიყენეთ ყველა დახმარება: ზარი ახლობელთან, რომლის შემდეგაც გახდით “ოცნების“ წევრი, აქტივისტების დახმარება, რომლის შემდეგაც გამოხვედით მიტინგზე და მასას მოსწყვიტეთ აპლოდისმენტები და 50/50-ზე, რაც ნიშნავს, რომ თქვენი განთლება არ არის დიპლომის ჩანაწერის ადეკვატური, მაგრამ მისაღებია.
სავარაუდო პასუხები: ა) მოაგვაროთ საქმე ივანიშვილის კარდინალათან და დაინიშნოთ მინისტრად; ბ) მოაწყოთ პროვოკაცია, დაგმოთ უკანასკნელი სიტყვებით სააკაშვილი, მოაგვაროთ საქმე კარდინალთან და გახდეთ მინისტრთა კაბინეტის წევრი; გ) ჩაისვათ კარდინალი წილში და გახდეთ ივანიშვილის მთავრობის წევრი; დ) ხართ ივანიშვილის და მისი ოჯახის მეგობარი, მოყვარე და ცალკეული “მოგვარებების“ შემდეგ გახდეთ მინისტრი;
დრო... წიკ, წიკ, წიკ...
დიახ, ნებისმიერი პასუხის შემთხვევაში _ თქვენ მოიგეთ 20 ათასი!
ახლა კი უფრო სერიოზულად. თუ “ოცნებამ“ ასე გააგრძელა ქვეყნის მართვა, მომავალი წლის შემოდგომისთვის ქვეყანაში ან მისი მმართველობა დასრულდება ნებაყოფილობით, ან ხალხი მინიმუმ გაროზგავს “ოცნებას“ და მაქსიმუმ _ განდევნის მას. ამ ყველაფერს ხელისუფლების უგერგილო “პიარშიკები” ნაცების მორიგ დესტრუქციას დააბრალებენ და როგორც ნებისმიერ ხელისუფლებას სჩვევია, საკუთარ შეცდომებზე არავინ დაიწყებს საუბარს, მაგრამ ეს უკვე დაგვიანებილი იქნება.
შეიძლება, დღევანდელი გადასახედიდან ეს მავანთ ილუზიად ეჩვენებათ, თუმცა თუ ყველაფერს თანმიმდევრობით დავალაგებთ, ადვილად შევამჩნევთ, რომ შედეგი იქნება _ “რაც მოგივა, დავითაო...“
პრემიერ-მინისტრს, რომელიც ჩემოდანზე ზის და რეალურად პასუხიმგებლობას გაურბის, მაგრამ ვერსადაც ვერ გაექცევა, ერთი არაორდინალური გადაწყვეტილება მიუღია. გახსოვთ, ვარდების ხელისუფლებას როგორ უხდიდა “სოროსი ივანიშვილი“? ისევ ამ გზით წასულა ბატონი პრემიერი და მინისტრებს ისედაც კოლოსალურ ხელფასზე დანამატად, ქეშად, 20 ათას აშშ დოლარს უხდის.
არა! - ხელებს გაასავსავებენ ოცნების ლიდერები და ქეშით პრემიირებული მინისტრები, მაგრამ ადამიანურ სისუსტეებს რა ვუყოთ? ივანიშვილის ხაზინადარებსაც, რომლებთანაც აშკარად წუწურაქობს ბელადი, ჰყავთ ოჯახები და ზოგიერთებს გრძელი ენაც აქვთ.
ამ ამბავმა სხვადასხვა ინტერპრეტაციით გამოჟონა ივანიშვილის გარემოცვიდან და ჩიტი ბურჯანაძესთანაც მიფრინდა. მას შემდეგ პრეზიდენტობის კანდიდატი ბურჯანაძე არც ერთ შეხვედრაზე არ ივიწყებს მინისტრების მოხსენიებას. თუმცა ერთი შეცდომა მაინც მოსდის, ლარი და დოლარი ერევა ერთმანეთში. ამით კი მინისტრების უკანონო, დიახ, უკანონო შემოსავალს თვეში მინიმუმ 13 ათასი ლარით ამცირებს. ცუდი არ იქნება, თუ პრეზიდენტობის კანდიდატი მეტად გულისხმიერად მოეპყრობა 24 საათის განმავლობაში ხალხის სამსახურში მყოფი ადამიანების გარჯას.
კიდევ ის, რომ არა მარტო ქალბატონი ბურჯანაძე, არამედ ნებისმიერი “ჩასაფრებული“ ადამიანი ასეთ უინტერესო და უხერხემლო კითხვებს არ უნდა სვამდეს: “ნაციონალებს" გასრიალებული მანქანები ჰყავდათ, მაგრამ ამათ, “ნაციონალების" ნაჯდომ მანქანებში არ ჩავსხდებითო და ახალი, უკეთესი მანქანები იყიდეს. მშვენივრად მოთავსდნენ “ნაციონალების" სკამებში და მანქანაში რატომ ვერ ჩასხდებოდნენ, ხომ არ იცით?"
რას ჰქვია, არ ვიცით... გახსოვთ ალბათ, ხელისუფლებაში გადაბარგებულმა მეოცნებეებმა, რომლებმაც ყველაზე სარფიან ლუკმას გამოჰკრეს ხელი, პირველივე თვეებში ვერ გაუძლეს ცდუნებას და საკუთარ თავს კოლოსალური პრემიები გამოუწერეს. მერე ასე თქვა პარლამენტის თავმჯდომარემ, პრემიებს რომ იწერენ, მახინჯი კანონის ბრალიაო.
მაშინ ივანიშვილმა და მისი კაბინეტის წევრებმა საზოგადოებას უთხრეს, რომ ბევრს შრომობდნენ და ეს პრემიებიც დამსახურებული იყო. პრემიერს კი დაახლოებით ასეთი რამ წამოსცდა: ეს სუკინ სინი “ოცნების“ სუკინ სინია და ნაცების სუკინ სინს სჯობიაო. ვერაფერს იტყვი: უმყარესი ლოგიკაა.
შემდეგ ივანიშვილი მიხვდა, რომ პროცესს ვერ დაიჭერდა (ანუ არასამთავრობოებისა და მედიის ყაყანს) და მთავრობის წევრებს, მინისტრებს ხელფასები მაქსიმალურად გაუქაჩა. წლების განმავლობაში დაბეჩავებულმა ქართულმა საზოგადოებამ ერთი კი წაიკნავლა საარსებო მინიმუმთან მინისტრების ჯამაგირის შედარებისას, მაგრამ მანაც მედიდურად დაიმშვიდა თავი _ მუშაობენ ეს “სუკინ სინები“ და რა ქნან, ქრთამს ხომ არ აიღებენო?
გახსოვთ, ალბათ, პიარი ივანიშვილის ფილოსოფიით გატაცების შესახებ (ხვდებით ახლა მის არჩევანს ფილოსოფოს კანდიდატთან დაკავშირებით?) ალბათ, ისიც გახსოვთ, “მაესტროში“, ეკა ბერიძესთან სტუმრობისას, როგორ გაიხლართა ფილოსოფიურ ლაბირინთებში მომავალი პრემიერი. მაშინ ოცნების ერთ-ერთი სახე, ამჟამად დეპუტატი, მარწმუნებდა, რომ ივანიშვილი უდავოდ ინტელექტუალია და მისი ფილოსოფიური ხედვები ოჯახთან და აღზრდასთან, სახელმწიფოს მოწყობასთან დაკავშირებით არის ახალი სიტყვა მსოფლიოს ფილოსოფიურ სკოლაშიო.
რადგან არისტოტელე, სპინოზა, შოპენჰაუერი, ინგარდენი, მერლო-პონტე თავიანთ შრომებში კორუფციის მეშვეობით სახელმწიფო სისტემის ნგრევაზე თითქმის არაფერს ამბობენ, ეტყობა, ივანიშვილმა გადაწყვიტა, აქაც ეთქვა ახალი სიტყვა და თითოეულ მინისტრს, სამის გარდა, ყოველთვიურად ქეშად 20 ათასი აშშ დოლარი დაუმატა. იმ სამმა კი თავად თქვა უარი დანამატზე.
გავიგე, რომ ქვეყანაში ლარი კინგზე მაღალანაზღაურებადი ჟურნალისტებიც გვყოლია, გავიგე, რომ მრჩევლებს შეიძლება თანხა იმაში უხადო, რომ არაფერს გირჩევენ, გავიგე, რომ პიარშიკებს შეიძლება ჯამაგირი ანტიპიარში გადაუხადო და ბევრი სხვა რამ გავიგე... მაგრამ ჯერ ვერ გავარკვიე, ცალკეული მოხელე, თავისი “უმადური“ და გაზულუქებული ხელმძღვანელის შემხედვარე, თავადაც რომ ჩაერთოს კორუფციაში, დაშავდება რამე?
ქვეყანაში ელიტარული კორუფცია ისევ ყვავის. კვლავ ნეპოტიზმი, პროტექციონისტული ტენდერები, ლამის 800%-ით გაზრდილი კვერცხის ექსპორტი, წილების ჯერაც დაუსრულებელი გადანაწილება, ქონების წართმევის ნაცვლად, მისი გადაფორმება, კიდევ ბევრი სხვა რამ, რაც მხოლოდ ივანიშვილის კასტისთვისაა დასაშვები, სწორედ ისევე, როგორც ადრე სააკაშვილის გარემოცვისთვის იყო. თუმცა თუ საკუთარ თავთან მართლები ვიქნებით, ახლა უფრო გახსნილად და მახინჯი ფორმებით.
ივანიშვილი კი მაინც ჯიუტად იმეორებს: ვის უნდა 20 ათასი? რატომ? საყიდელი ჯერაც ბევრია. ეს ქვეყანა მისთვის მაინც ქარვასლაა...
სიჩუმე! ყურადღება! ახალი თამაში იწყება... კითხვა...
გოჩა მირცხულავა, გაზეთი "პრემიერი", 4-11 სექტმებერი
1 - USD - 2.416
1 - EUR - 2.981
100 - RUB - 3.922
2579
