«წლის ბოლოს ბიუჯეტს დაახლოებით 600 მლნ ლარამდე დანაკლისი ექნება»

ფინანსთა მინისტრი თავის პროგნოზებში მყარი აღარ არის და მტკიცებითი ფორმით აღარ აცხადებს, რომ 2013 წელს ეკონომიკა 6%-ით გაიზრდება. ნოდარ ხადურის ტონის შერბილება გასაკვირია იმ ფონზეც, როდესაც დაახლოებით 3 თვის წინ სებ-ის პრეზიდენტი და სსფ ღიად ალაპარაკდნენ იმაზე, რომ წლის ბოლოს 6%-იანი ზრდის მიღწევა გაძნელდებოდა. თუმც მაშინ ნოდარ ხადური მტკიცე და შეუვალი იყო თავის პოზიციებში და ქვეყანას ამცნობდა, _ ერო, ყველაფერი კარგადაა და ეკონომიკური ზრდა გეგმის ფარგლებში გვექნებაო. რას ფიქრობს ოპოზიცია ფინანსთა მინისტრის «ფერისცვალებაზე»? გაზეთი «პრემიერი» «ერთიანი ნაციონალური მოძრაობის» ერთ-ერთ ლიდერს გიორგი ვაშაძეს დაუკავშირდა.

_ ფინანსთა მინისტრმა, კითხვაზე: რამდენპროცენტიანი ეკონომიკური ზრდა გვექნება წლის ბოლოს? განმარტა, რომ სსფ-სა და მსხვილი საერთაშორისო ორგანიზაციების გათვლებით, ეკონომიკა 4%-ით გაიზრდება და დაველოდოთ მოვლენების განვითარებასო. ამ შემთხვევაში ნოდარ ხადურის ტონი მტკიცებითი აღარ იყო და მას აღარ განუცხადებია, რომ წლის ბოლოს ეკონომიკა აუცილებლად 6%-ით გაიზრდებოდა, როგორც ამას აანონსებდნენ. თქვენი აზრით, რას უკავშირდება ქვეყნის პირველი ფინანსისტის მხრიდან ტონის შერბილება?

_ ცალსახაა, რომ ქვეყანა უკვე ღრმა ეკონომიკურ კრიზისში იმყოფება და მას სხვა გამოსავალი აღარ აქვს. უკვე მოახლოვდა წლის ბოლო და ფაქტია, რომ წლევანდელი წელი საქართველოზე ეკონომიკურად საკმაოდ ნეგატიურად აისახა. ბევრი ადამიანი უმუშევარი დარჩა და აღარ აქვს შემოსავალი. ხალხს უფრო მეტად უჭირს, ვიდრე უჭირდა გუშინ, გუშინწინ და გასულ წელს. რეალურად ფინანსთა მინისტრი საკუთარ პროგნოზს მაინც არ ამბობს, მაგრამ რეალობა ის არის, რომ სწორედ იმ არასწორმა გადაწყვეტილებებმა, რომელიც მათ მიიღეს მთავრობაში ყოფნის პერიოდში, სერიოზული პრობლემები მოუტანა საქართველოს. მოუტანა პრობლემები, როგორც ეკონომიკური ზრდის კუთხით, ასევე უშუალოდ რაც ფინანსთა მინისტრს ეხება. ეს არის საბიუჯეტო საკითხები. საბიუჯეტო შემოსავლების კუთხით მათ სერიოზული პრობლემები აქვთ, 348 მლნ ლარი უკვე აკლიათ ბიუჯეტში _ მათი ინფორმაციით, თუმცა ჩვენი ინფორმაციით, დანაკლისი უფრო მეტია. ჩვენი გათვლებით, წლის ბოლოს ბიუჯეტს დაახლოებით 600 მლნ ლარამდე დანაკლისი ექნება.

_ ბატონო გიორგი შექმნილ ეკონომიკურ კრიზისში ფინანსთა მინისტრი გარკვეულწილად «ერთიან ნაციონალურ მოძრაობასაც» გადანაშაულებთ. მისი განცხადებით, «ნაციონალური მოძრაობის» ქმედებებმა ქვეყნის ეკონომიკური მდგომარეობა გაართულა. ნოდარ ხადურმა განაცხადა, რომ «ნაციონალური მოძრაობის» სურვილები ნამდვილად არ გამართლდება და საქართველო ინვესტორებისთვის ერთ-ერთი საუკეთესო ქვეყანა იქნება».

_ ფინანსთა მინისტრი ისევ იგივე ალოგიკურ სიტუაციაშია და ყველაში დამნაშავეს ეძებს, საკუთარი თავისა და მთავრობის გარდა. მგონი, ხალხიც დაიღალა ამ გადაბრალებებით. ფაქტია, რომ მათ ხელთ აქვთ ხელისუფლების მართვის სადავეები და ჩვენ მათ ჯერ კიდევ დეკემბერში ვთავაზობდით, რომ ეკონომიკა ცალკე საკითხად გაგვეტანა და ბევრი კონსულტაცია გვქონოდა, რადგანაც გვქონდა ძალიან ბევრი შეთავაზება. გასულ თვეში ჩვენ ეკონომიკის მინისტრსა და მთავრობას შევთავაზეთ შეხვედრა ძალიან კონკრეტული ნაბიჯებით, თუ რა უნდა გააკეთონ მათ იმისთვის, რომ ბიზნესი და ეკონომიკა განვითარდეს და ასე მკვეთრად არ მცირდებოდეს სამუშაო ადგილები. მაგრამ ყოველთვის ნეგატიურ პასუხებს ვიღებთ. მეორე პასუხი, რასაც მათგან ვიღებთ, არის ის, რომ ეს ყველაფერი არის კოჰაბიტაციის ბრალი. საქართველოში კოჰაბიტაცია არ არსებობს _ ეს ცალსახად უნდა ვთქვათ, იმიტომ რომ ჩვენ ვთავაზობთ წინადადებებს, მათი მხრიდან კი არის სულ მიზეზების ძიება, თუ რატომ არ დაჯდებიან ჩვენთან ერთად და თუ რატომ არ უნდა გველაპარაკონ. მინდა გითხრათ, რომ არც ერთ შემთხვევაში არ ყოფილა მოლაპარაკება ჩვენსა და მათ შორის, არ ყოფილა გამოცდილების გაზიარების პროცესი. ზუსტად ამიტომ ვდგავართ ასეთი მნიშვნელოვანი პრობლემების წინაშე საბიუჯეტო თვალსაზრისით, ეკონომიკური ზრდის თვალსაზრისით და უმუშევრობის ზრდის თვალსაზრისით.

_ «ნაციონალურ მოძრაობას» ხელისუფლებაში ყოფნის 9-წლიანი გამოცდილება აქვს. თქვენი გადმოსახედიდან შექმნილი სიტუაციიდან გამოსავალს როგორ ხედავთ?

_ ჩვენ საკმაოდ სერიოზული და კონკრეტული შეთავაზებები გვაქვს. პირველი _ ეს არის ეკონომიკური დანაშაულის დეკრიმინალიზაცია, მეორე _ ამნისტია ახალი ეკონომიკური ფინანსური დანაშაულების, მნიშვნელოვანია ასევე სხვადასხვა, პატარ-პატარა ინიციატივები.

_ წინა ხელისუფლების პირობებში, ფინანსური ამნისტია რაც მახსენდება, ეს არის ტელევიზიებთან მიმართებაში გამოცხადებული ამნისტია. თუკი ამნისტია და დეკრიმინალიზაცია ერთგვარი პანაცეაა, თქვენი ხელისუფლების პირობებში რატომ არ ხორციელდებოდა, თუ მაშინ ეს საჭირო არ იყო?

_ «ერთიანმა ნაციონალურმა მოძრაობამ» ფინანსური ამნისტია გამოაცხადა ხელისუფლებაში მოსვლის შემდგომ. ქონების ლეგალიზაციის შესაძლებლობა ჰქონდა აბსოლუტურად ყველას და «ნაციონალური მოძრაობის» ხელისუფლება არც ერთხელ ასეთი კრიზისის წინაშე არ დამდგარა. თუმცა თუ საჭირო იყო შესაბამის ქმედითი ნაბიჯების გადადგმა, ჩვენი ხელისუფლება ყოველთვის დგამდა.

_ არსებული მაკროეკონომიკური პარამეტრების გათვალისწინებით, უნდა დადგეს თუ არა ნოდარ ხადურის თანამდებობრივი პასუხისმგებლობის საკითხი და არის თუ არა მისი ადგილი იმ ახალ მთავრობაში, რომელიც პრემიერ-მინისტრის პოსტიდან წასვლის შემდეგ დაკომპლექტდება?

_ ჩემი აზრით, ნოდარ ხადურის ადგილი მთავრობაში ნამდვილად არ არის, ძალიან მარტივი მიზეზის გამო _ როგორც ჩანს, ბიუჯეტის დანაკლისი წლის ბოლოს 600 მლნ ლარი იქნება. ასეთ შემთხვევაში იმედი მაქვს, რომ მისი პასუხისმგებლობის საკითხს თავად «ქართული ოცნება» დააყენებს.

_ ბიუჯეტში წარმოქმნილი პრობლემების გათვალისწინებით გაუჭირდება თუ არა მთავრობას ვალდებულებების გასტუმრება და დანაპირების შესრულება?

_ «ქართულ ოცნებას» 83 დაპირებიდან მხოლოდ ერთი დაპირება აქვს შესრულებული და ეს არის ამნისტია. მას სხვა ჯერ არაფერი შეუსრულებია. ფაქტია, რომ ისინი ვერ ასრულებენ იმ დაპირებებს, რომელიც მათ წინასაარჩევნოდ გასცეს.

მაია არაბიძე, გაზეთი ”პრემიერი”, #2, 11-17 სექტემბერი

FaceBook

კომენტარები გამორთულია