როგორ გახდნენ “მიშისტი” ჩხენკელები “ოცნებისტები”

“ნაციონალების” “ოცნების” ხელისუფლებაში პორტირება გრძელდება. მეტიც, თუ აქამდე “ოცნებაში” მხოლოდ რეგიონებსა და რაიონებში “ბარგდებოდნენ”, ახლა სააკაშვილის უარყოფა მათაც დაიწყეს, ვისაც 9 წლის განმავლობაში მაღალი თანამდებობები ეკავათ და, შესაბამისად, გუნდის ერთგულებად ითვლებოდნენ. ჰაერზე ლაპარაკი რომ არ გამოგვივიდეს, სჯობს, კონკრეტულ მაგალითზე გადავიდეთ. ეს “კონკრეტული მაგალითი” კი, როგორც “პრემიერის” კონფიდენციალური წყარო ამბობს, შოკისმომგვრელია.

ძმები ჩხენკელები ფართო საზოგადოებისთვის მაინცდამაინც ცნობილი სუბიექტები არ არიან. სამაგიეროდ, “პრემიერის” წყაროს განმარტებით, აკაკი, რომან და ლაშა ჩხენკელებს პოლიტიკურ და ბიზნეს ისტებლიშმენტში კარგად იცნობენ. სამი ძმიდან პირველი, რომელმაც ახალ ხელისუფლებაში მაღალი თანამდებობა მიიღო, აკაკი ჩხენკელია _ ის 2013 წლის მიწურულს მთავრობის კანცელარიის რეგიონებსა და ადგილობრივ თვითმმართველ ორგანოებთან ურთიერთობის დეპარტამენტის ხელმძღვანელად დაინიშნა. შეგახსენებთ, რომ ეს თანამდებობა ბიძინა ივანიშვილის პრემიერობის დროს ყოფილ “ფორუმელს”, ირაკლი მელაშვილს ეკავა.

2013 წლის გაზაფხულზე “ოცნების” ხელისუფლებაში აკაკი ჩხენკელის ძმა, რომანი გამოჩნდა _ აჭარის აუდიტის დეპარტამენტის უფროსის მოადგილედ დაინიშნა. ახლახან კი, პრემიერ ირაკლი ღარიბაშვილის ეკონომიკური მრჩეველი გახდა.

აკაკი და რომან ჩხენკელების ნაბოლარა ძმა, ლაშა კი, საქართველოს სავაჭრო-სამრეწველო პალატის პირველი ვიცე-პრეზიდენტი და ამასთანავე, ტელეკომპანია “ტვ 3”-ის ერთ-ერთი დამფუძნებელია.

უცნაურია, მაგრამ “ოცნება” კატეგორიულად უარყოფს, რომ აკაკი, რომანი და ლაშა ძმები არიან. “პრემიერის” წყარო კი, რომელიც აცხადებს, რომ ჩხენკელებს დიდი ხანია იცნობს, საწინააღმდეგოს ამტკიცებს.

მაინც, ვინ არიან ჩხენკელები და რატომ გახდა მათი თანამდებობებზე დანიშვნა განსჯა-გაანალიზების საგანი?

უფროსი ძმა, აკაკი ჩხენკელი, როგორც “პრემიერის” წყარო ამბობს, “ნაციონალების” დროს პროკურორი და ადეიშვილ-ჩხატარაშვილის “საძმოს” წევრი იყო.

“ამ “საძმოს”, 9 წლის განმავლობაში, უამრავი ადამიანი ჰყავს გაუბედურებული”, _ ამბობს ინფორმატორი.

რაც შეეხება შუათანა ძმას, აკაკის, ის, თურმე, ფინანსთა სამინისტროს შემოსავლების სამსახურის აუდიტის დეპარტამენტს ხელმძღვანელობდა. ნაბოლარა ლაშა კი, ვანო ზოდელავას მერობის დროს, თბილისის მერიის თანამშრომელი ყოფილა, ხოლო “ვარდების რევოლუციის” შემდეგ საგადასახადო უწყებაში დაუწყია მუშაობა.

“ნაციონალების” სიძლიერეს სამი ფაქტორი განაპირობებდა _ პროკურატურა, საგადასახადო და ფინანსურის აუდიტის სამსახური, ანუ ბიზნესმენს ქონებას, გნებავთ, ფულს თუ პროკურატურა ვერ წაართმევდა, მაშინ საქმეში საგადასახადო ერეოდა, მაგრამ, თუ საგადასახადოც ვერაფერს გახდებოდა, შემოსავლების სამსახურის აუდიტის დეპარტამენტი ამოქმედდებოდა და ურჩ მეწარმეს მიწასთან გაასწორებდა. ძმები ჩხენკელები სწორედ ამ სადამსჯელო უწყებებში იყვნენ გადანაწილებულნი”, _ ამბობს წყარო.

უკვე ცნობილია, რომ რომან ჩხენკელი ბანკ “ქართუს” გაკოტრებაში მონაწილეობდა. ამის გამო, ბრალდებულიც იყო, თუმცა პატიმრობას თავი 15 ათასი გირაოს სანაცვლოდ დააღწია.

“პრემიერის” წყაროს მოსაზრებით, სწორედ მაშინ, როცა “ნაციონალებმა” ბანკ “ქართუს” გაკოტრება გადაწყვიტეს, რომან ჩხენკელმა ხერხი იხმარა _ ოფიციალურად გააფორმა, რომ თითქოს შვებულებაში გავიდა, თუმცა წყარო განმარტავს, რომ შვებულება ფიქცია იყო და რომან ჩხენკელმა შვებულება კაბინეტში გაატარა.

რისთვის დასჭირდა აწ უკვე პრემიერ ღარიბაშვილის ეკონომიკურ მრჩეველს ეს მაქინაცია?

“აკაკი ჩხენკელი, როგორც ჩანს, გრძნობდა, რომ პოლიტიკური სიტუაცია შეიცვლებოდა და შვებულებაში გასვლაც ამიტომ გაითამაშა, თუმცა სინამდვილეში, შვებულება კაბინეტში გაატარა, ბანკ “ქართუს” გაკოტრების დოკუმენტაციის მომზადებასაც თავად ხელმძღვანელობდა, მაგრამ საბუთზე ხელი თავის მოადგილესა და ერთ-ერთ თანამშრომელს, ლაშა ლაშხიასა და ოთარ აგლაძეს მოაწერინა. ამით ჩხენკელმა “ორი კურდღელი” დაიჭირა _ “ნაციონალების” დაკვეთაც შეასრულა და საქმე ბოლომდე არც “ოცნებასთან” გაიფუჭა”, _ ამბობს “პრემიერთან” პრივატულ საუბარში ინფორმატორი.

ინფორმატორის მიერ მოწოდებული ინფორმაციითვე, ფინანსთა სამინისტროს შემოსავლების სამსახურის აუდიტის დეპარტამენტის ხელმძღვანელობის დროს, აკაკი ჩხენკელის ინიციატივით, ე.წ. ალტერნატიული აუდიტის პროექტი დაიწყო, რაც იმას ნიშნავდა, რომ, თუ რომელიმე საწარმო ან უწყება წინააღმდეგი იქნებოდა, რომ საგადასახადოს შეემოწმებინა, მას უფლება ეძლეოდა, ალტერნატიული აუდიტი დაექირავებინა. საერთოდ, როგორც წყარო ამბობს, აუდიტის მომსახურება ადვოკატის მომსახურებაზე ძვირი ღირს და აუდიტისთვის ასანაზღაურებელი თანხა ზოგჯერ 100 ათასსაც აღწევს.

რისთვის დასჭირდა აკაკი ჩხენკელს ალტერნატიული აუდიტის პროექტი? _ “პრემიერის” ამ შეკითხვაზე ინფორმატორი ასე პასუხობს:

“აკაკი ჩხენკელმა ალტერნატიულ აუდიტის პროექტში უცნობი, ახლად შექმნილი აუდიტორული კომპანიები ჩასვა. დიდი გამოცდილებისა და სანდო აუდიტორულ ფირმებს კი, გაურკვეველი მიზეზით, უარი უთხრა. შესაბამისად, გაჩნდა ეჭვი, რომ ეს იყო კორუფციული სქემა, ანუ უცნობი და გამოუცდელი აუდიტორული ფირმების რამდენიმენულიანი შემოსავლიდან სოლიდური თანხა, ალბათ, ჩხენკელსა და მის გუნდთან მიდიოდა”.

თუ ყველაფერი, რასაც ინფორმატორი ვარაუდობს, სიმართლეა, საინტერესოა, პრემიერმა ირაკლი ღარიბაშვილმა რატომ გადაწყვიტა, რომ აკაკი ჩხენკელი თავის ეკონომიკურ მრჩევლად დაენიშნა?

კულუარებში მოარული ხმებით, ჩხენკელების “ოცნების” ხელისუფლებასთან დამეგობრება ლაშა ჩხენკელის დამსახურებაა. იმასაც ამბობენ, რომ ლაშა ჩხენკელი ირაკლი ღარიბაშვილს თითქოს 2012 წლის პირველი ოქტომბრის საპარლამენტო არჩევნებამდეც იცნობდა. მეტიც, უმცროსი ჩხენკელი, დღეს, თურმე, ბიზნესის საქმეებს ალაგებს.

“რომან ჩხენკელი ამბობს, რომ ლარი მაშინ გამყარდება, როცა ეკონომიკა ჯანმრთელი იქნება, მაგრამ ქვეყანაში, სადაც პრემიერი-მინისტრის მრჩეველი რომან ჩხენკელია, ეკონომიკა როგორ გამოჯანმრთელდება?!” _ ორაზროვნად კითხულობს ინფორმატორი, რომელიც ამბობს, რომ მას შემდეგ, რაც ცნობილი გახდა, რომ ჩხენკელი პრემიერის ეკონომიკურ მრჩევლად დაინიშნა, მხოლოდ ქართველმა კი არა, უცხოელმა ინვესტორებმაც დაიწყეს ფიქრი საქართველოდან ინვესტიციების გატანაზე.

“უამრავი მაგალითი არსებობს, როცა აუდიტის დეპარტამენტის ხელმძღვანელობის დროს ჩხენკელმა ბიზნესმენები გააკოტრა. ხელისუფლების შეცვლის შემდეგ, ინვესტორებს იმედი გაუჩნდათ, რომ სიტუაცია შეიცვლებოდა, მაგრამ პრემიერ-მინისტრის გვერდით ჩხენკელი რომ დაინახეს, ხელი საბოლოოდ ჩაიქნიეს”, _ ამბობს “პრემიერის” წყარო.

საქართველოს ყოფილმა პრემიერ-მინისტრმა, ბიძინა ივანიშვილმა პირველ პრესკონფერენციაზე, რომელიც სამოქალაქო სექტორში გადასვლის შემდეგ გამართა, საქართველოს მოსახლეობას ურჩია, ყველაფერს იუმორით შეხედოს. “ნაციონალებთან” დაახლოებული ძმები ჩხენკელების “ოცნებაში” პორტირებაც, როგორც ჩანს, “იუმორით შეხედვის” სერიიდან არის. უფრო მძაფრად თუ ვიტყვით, თუ ბოლო წუთამდე “ნაციონალური” ხელისუფლების დავალებების შემსრულებელი იყავი და შენზე გონივრული ეჭვიც არსებობს, რომ რაღაცებს მიჰქარავდი, სანერვიულო არაფერი გაქვს, რადგან უბატონოდ ხმას ვერავინ გაგცემს, მთავარია, “ოცნებასთან” მისასვლელი გზა მოძებნო, მიშა გულიანად აგინო და მაღალ თანამდებობაზე შენს დანიშვნას წინ აღარაფერი დაუდგება. ყოველ შემთხვევაში, ჩხენკელების “თავგადასავალი” სწორედ ასეთი დასკვნის გამოტანის საშუალებას იძლევა.

“ძალიან მაინტერესებს, რომან ჩხენკელმა პრემიერ-მინისტრ ირაკლი ღარიბაშვილს რა უნდა ურჩიოს? ალბათ, ის რჩევები უნდა მისცეს, როგორ უნდა მოხდეს ბიზნესმენების გატყავება და როგორ უნდა დააქციოს სახელმწიფო მოხელემ გადასახადის გადამხდელი? ისიც მაინტერესებს, თუ ჩხენკელი თავიდანვე “ოცნებასთან” იყო, მაშინ ადეიშვილის დავალებებს რატომ ასრულებდა? ირაკლი ღარიბაშვილს ამ ადამიანის უნდა ეშინოდეს, რადგან თუ ზურაბ ადეიშვილს უღალატა, რა გარანტია არსებობს, რომ რომან ჩხენკელმა ღარიბაშვილსაც არ უღალატოს?” _ კითხულობს “პრემიერის” ინფორმატორი, რომელიც, სხვათა შორის, დღემდე “ოცნების” აქტიური მხარდამჭერი და აქტივისტია.

გეგა სილაგავა, გაზეთი „პრემიერი“

FaceBook